Situada a 53 quilómetros de Compostela, aquí o Camiño Primitivo únese ao Francés multiplicando as experiencias xacobeas que ofrece ao visitante. Melide sempre foi unha localidade chea de atractivos turísticos de gran importancia histórica, moitos deles orixinais da Idade Media.
As primeiras mencións históricas datan do século X, despois de que no primeiro terzo do século IX tivese lugar o descubrimento do sepulcro do Apóstolo Santiago o Maior. Este acontecemento produciría un movemento imparable de todo o mundo cristián cara a Compostela. Melide era por entón un centro medieval repoboado por mandato de Alfonso IX. Aí sería cercado, converténdose nunha vila de pousadeiros que prestaban servizo aos peregrinos e a outros camiñantes que por aquí circulaban.
Como punto de encontro das rutas xacobeas, Melide recibía a numerosos viaxeiros e acollería a grupos de comerciantes e artesáns, atraídos polas boas expectativas de negocio existentes. Este feito explicaría a abundancia e a categoría dos seus hospitais xacobeos. Un dos máis destacados estivo situado á beira da antiga conventual franciscana de Sancti Spiritus, da que se cre que dependía. Posiblemente data do mesmo ano que o mosteiro, 1375, aínda que hai fontes que sosteñen que foi instituído no ano 1502 e que contaba con 24 camas dobres, unha práctica moi común na Idade Media. Sobre os vestixios deste vello hospital atópase desde o ano 2001 o Museo da Terra de Melide.
Outro centro asistencial medieval situábase á saída da cidade, asociado á igrexa románica de Santa María. Por último, tense constancia da existencia dun lazareto atendido polos monxes da Orde de San Lázaro, que se atopaba extramuros, onde se adoitaban emprazar este tipo de institucións.
No trazado xacobeo pola localidade atópanse certos monumentos relacionados co camiño e o Apóstolo. En definitiva, un lugar que nos traslada ao berce histórico dun enclave crucial no Camiño francés. Se queres saber máis sobre os elementos destacados de Melide, descobre os seguintes puntos de interese.
